Me het e Idee gha im Dütsche: Für 9€ im Monet söll me vo Juni bis Auguscht im ganze Land chönne Zug fahre. Wie lang d‘Bürokratie im dütschsprochige Ruum brucht, zum öppis umsetze, das wüssemer alli. Mit däm 9€-Ticket wüssemer jetz au: Die Zit bruuchts offebar au. Bim 9€-Ticket isch einiges nit bedacht worde. Zum Politiker wärde mues me jo au nit bsunders intelligänt si – das het me hingege in dr Schwiz jo au scho hüffig bewiise.

Aber guet, ich finds nit numme blöd. Günschtiger ÖV fahre isch jo e gueti Idee und jetz luegemer mol, öb mir Schwizer das au chönne bruuche.

isch das öppis?

Als Schwizer chasch au Du das 9-Ticket chaufe. In Dütschland müese Iheimischi und EU-Bürger die gliiche Rächt ha in söttige Sache. Und wills z‘kompliziert wär, das für Schwizer uszschliesse, goht das ebe au für uns. Und wills au z‘kompliziert wär, das Billett nur regional gältend z‘mache, giltets ebe im ganze Land.

Im Prinzip isch das wie e Abo bi uns. Zum Bischpil s‘TNW oder A-Wälle und wases nit alles git. Aber halt ebe dütschlandwit. Dr einzig Unterschiid isch, dass me nume regionali Verbindige benutze cha und keini Schnällzüg. Im Düsche heisst das Nochverkehr.

Du chasch also vo Basel uf Hamburg oder wo ane au immer fahre, dr ganz Monet lang. Näb em Zug chasch au alli Büs, Drämmli, Schwebebahn, U-Bahn usw. fahre.

Was bedütet Nochverkehr?

Das isch fascht alles, was kei Schnällzug isch:

• S-Bahn (z.B. S1)
• RegioExpress (z.B. RE 2)
• RegionalBahn (z.B. RB 3)
• Tram, Bus, U-Bahn, Metro, Schwebebahn und was halt süscht no im Stadtgebiet zum ÖV ghört

Zum längeri Strecke fahre isch das bitz besser geignet als bi uns in dr Schwiz, wills villi Züg im Nochverkehr git, wo au mehreri 100km fahre.

Aber wenn unklar isch, was jetz zum Nochverkehr ghört und was nit, denn goht me eifach uf www.bahn.de und gitt ii, vo wo nach wo me fahre will. Denn gits dört e Chäschtli wo heisst „Nur Nahverkehr“. Wenn me das aklickt und denn uf „Suchen“ goht, chömme nume Verbindige, wo mit däm 9€-Ticket funktioniere.

Wo chame das chaufe?

Entweder uf bahn.de, in dr App vo dr Bahn, vo verschidene Verkehrsverbünd oder eifach am Billettautomat. Das isch am eifachschte. Am beschte suecht me sich e rote Automat vo dr Bahn. Wie au bi uns gits Automate vo dr Bahn und söttigi vo de Verkehrsverbünd. Es goht beides, aber für alles machi au kei Aleitig.

Wenn s‘Billett use cho isch, mues me no si Name druf schribe. Aber das stoht ufem Billett sälber au druff. Und denn isches vom erschte bis am letschte gültig. Und zwar ab und bis Mitternacht.

Bahnhöf in dr Schwiz

Für Schwizer isch das ganze ebe interessant, will me au ab em Badische Bahnhof z‘Basel und ab Schaffhuuse cha fahre mit däm Billett. Entweder chame sini Reis ab dört plane, oder als Gränzgänger chame au d‘Zugstreckene im Dütsche benutze, zum Bispil vo Basel uf Schaffhuuse und umgekehrt fahre.

Was nit erlaubt isch

Ebe Schnällzüg, also ICE, IC, Flixtrain und Schnällzüg usem Usland wie EC, NJ, RJ usw.

Ich ha ghört, es gäbi au einzelni regionali Verbindige, wo vom Färnverkehr abotte wärde. Das goht au nit. Aber ebe: Ob das so isch stoht im Fahrplan vo dr Bahn.

Vill falsch mache chame also nit. Vo Basel uf Hamburg goht das halt 14 Stund – ob sich so e Reis lohnt, weissi au nit. Aber für 1-2 Wuche Städtereis, wie me das im Usland würd mache, isch das no e praktischi Sach. Oder au wenn me sowieso (wie bispilswiis ich) im Dütsche dä Summer Ferie macht, do lohnt sich das uf jede Fall.